Margir þolendur segja að öll skynsemi og rökhugsun hverfi þegar heimilisofbeldi hefst og ómögulegt sé að hugsa rökrétt og einfaldlega yfirgefa aðstæðurnar og ofbeldið. Því lögðum við til að í stað hefðbundinnar fræðslu um úrræði myndum við heyra raddir þolenda, og geranda, sem hafa fengið aðstoð. Þannig komum við á framfæri raunverulegum dæmum um fólk sem hefur leitað sér hjálpar og fengið hana og fetað slóðina til eðlilegs lífs á ný. Við vekjum athygli á því hvernig ólík úrræði, Kvennaathvarfið, Bjarkarhlíð, Lögreglan, Jafnréttisstofa og fleiri vinna nú þéttar saman til að hjálpa sem flestum þolendum að yfirvinna óttann við að stíga skrefið út í frelsið frá ofbeldi.